- Santa Claus achegouse ao CRA e á Escola Infantil Municipal, onde saúdou aos máis pequerrechos

- Melchor, Gaspar e Baltasar, acompañados polos seus paxes, estiveron nos colexios de Baño e Cordeiro

^{Valga, 22 de decembro de 2020.}

^{Os nenos dos centros educativos de Valga recibiron hoxe unhas visitas moi especiais. Coincidindo co último día de clase antes das vacacións de Nadal, Papá Noel e os Reis Magos non quixeron faltar á súa cita cos rapaces valgueses para recoller as súas últimas cartas e enchelos de ilusión nunhas festas moi diferentes ao habitual debido á pandemia.}

^{Os Magos de Oriente e Santa Claus repartíronse o traballo e acudiron a diferentes centros escolares. Papá Noel percorreu as escolas unitarias do CRA de Valga en Campaña, Forno, Chenlo, Xanza, Vilarello e Ferreirós. Cargando co seu saco e anunciando a súa chegada cunha campaíña, escoitou algúns dos regalos que os nenos queren que lles deixe baixo a chimenea en Noiteboa: coches, castelos, dinosaurios e outros moitos.}

^{A continuación, Papá Noel dirixiuse á Escola Infantil Municipal onde compartiu tamén uns minutos cos máis pequerrechos e os seus mestres, que os recibiron con caras de ledicia e ilusión.}

^{Pola súa parte, os Reis Magos acudiron aos colexios Baño-Xanza e Xesús Ferro Couselo. Fixérono acompañados polos seus paxes e mantendo sempre as oportunas medidas de seguridade. Os alumnos, algúns lucindo gorros, diademas e outros complementos de Nadal, foron saíndo por aulas e saúdaron a Melchor, Gaspar e Baltasar dende a distancia. Tamén puideron introducir as súas cartas no Buzón Real para recibir, o 6 de xaneiro, os seus regalos favoritos.}

^{Durante a súa estadía en Valga, os Magos de Oriente tamén aproveitaron para saúdar aos usuarios do Centro de Día, que saíron ao balcón do Auditorio ao seu paso por Ferreirós.}