- A representante autonómica referiuse ao nacemento como un recurso turístico “seguro e de gran calidade”

- As visitas están a ser fluídas, pero sen colas nin aglomeracións como en edicións anteriores

^{Valga, 21 de decembro de 2020.}

^{O alcalde, José María Bello Maneiro, e a concelleira de Turismo, Malena Isorna, acompañaron esta tarde á delegada territorial da Xunta, Luisa Piñeiro, nunha visita ao Belén Artesanal en Movemento. O rexedor e a responsable autonómica foron guiados pola presidenta da asociación cultural Amigos do Belén, Mª Carmen Castiñeiras, que lles explicou as diferentes escenas que forman parte do nacemento e as novidades incorporadas para este Nadal e que representan os principais acontecementos locais, nacionais e internacionais este ano 2020.}

^{A delegada destacou a “gran capacidade” de Galicia para ofrecer eventos e atractivos “seguros e de gran calidade” como é o caso do Belén Artesanal, que está declarado de Interese Turístico de Galicia. “Ás portas dun histórico Xacobeo 2021, Galicia ofrece innumerables posibilidades do máximo interese para os visitantes e que misturan, en moitos casos, as nosas tradicións e elementos da nosa identidade”, manifestou a representante autonómica.}

^{Luisa Piñeiro referiuse á capacidade do Belén Artesanal para adaptarse ás circunstancias e ofrecer, no marco da actual crise sanitaria, “a maior das seguridades” durante o seu percorrido. Neste sentido, hai que ter en conta que o nacemento de Campaña ten establecido un protocolo sanitario fronte á Covid-19 que inclúe toma de temperatura, hixienización de mans con xel hidroalcohólico e o mantemento da distancia de seguridade. A presidenta do colectivo Amigos do Belén ratifica que os visitantes perciben esa seguridade e, de feito, algúns xa teñen repetido visita en máis dunha ocasión.}

^{Este 25 aniversario do Belén está a ser peculiar debido, precisamente, á pandemia. Non se ven as largas colas nin aglomeracións de público, habituais en edicións anteriores, pero as visitas están a ser fluídas e bastante frecuentes, especialmente durante as fins de semana. As excursións e grandes grupos deixan espazo este ano a familias e a parellas e grupos de mozos, que están a aproveitar esta oportunidade de gozar do Belén dun xeito diferente: con máis calma e con posibilidade de deterse ata no máis mínimo detalle.}

^{Nos seus 400 metros cadrados de superficie, o Belén Artesanal conta con arredor de 4.500 figuras feitas todas de xeito artesanal, así coma as construcións e edificios, algúns deles réplicas de infraestruturas públicas de Valga, coma a Casa do Concello, o Auditorio Municipal, o Museo ou o Centro de Interpretación da Caña do País. O nacemento do Neno Xesús, a escena central da montaxe, comparte espazo con outras secuencias propias da tradición de Nadal, con paisaxes e costumes galegas, con acontecementos de relevancia mundial e persoeiros dos ámbitos político, cultural e social. Moitas das escenas están dotadas de movemento. Esta edición ten como novidade principal a pandemia da Covid-19, que está a marcar a actualidade durante todo este ano. A recreación da pandemia ocupa toda unha sección do Belén, relatada coma un conto dende que chegaron dende Wuhan as primeiras noticias dun novo e descoñecido virus. O confinamento ou o traballo dos sanitarios tamén aparecen representados.}

^{O nacemento estará aberto ao público ata a o día 10 de xaneiro en horario de 17:30 a 20:30 de luns a venres, de 17:00 a 20:30 os sábados e de 12:00 a 14:00 e de 17:00 a 20:30 os domingos e festivos.}