- A tenente de alcalde Carmen Gómez e os concelleiros Malena Isorna e Pedro Calvo entregáronlle os vales de compra a Mª Cruz Freiría

- O Concello ten en marcha unha edición especial de Nadal con outros dous sorteos de 500 euros para incentivar as compras no comercio local

^{Valga, 7 de decembro 2020.}

^{Mª Cruz Freiría Pardal, veciña do Sixto (Xanza), é a gañadora do último sorteo da primeira edición da campaña Merca-Valga, que se desenvolveu dende o mes de xullo por iniciativa do Concello para incentivar as compras nos comercios da vila e contribuír á reactivación da economía local durante a crise da Covid-19.}

^{A tenente de alcalde, Carmen Gómez, e os concelleiros Malena Isorna e Pedro Calvo fixeron entrega esta mañá dos 500 euros en vales de compra á agraciada no sorteo celebrado o pasado 28 de novembro. A papeleta premiada (número 8567), coincidente coas últimas catro cifras do sorteo da Lotería de Nadal, foille entregada ao realizar unha compra no Estanco Antón, e foi neste establecemento onde se realizou o acto de entrega do premio.}

^{A gañadora poderá gastar os vales de compra nos 73 establecementos de Valga adscritos a esta campaña, entre os que hai bares e restaurantes, negocios de alimentación, salóns de peiteado e estilismo, farmacias, carpinterías, estancos, estudos de fotografía, ferraxerías, droguerías, florerías, talleres de automoción, tendas de moda e fogar, mercerías, panaderías e pastelerías, taxis, logopedias, consultorías, negocios de xardinería e produtos agrícolas, hoteis e establecementos deportivos, entre outros.}

^{Ante a boa acollida que tivo esta iniciativa entre os establecementos e entre os veciños de Valga, o Concello decidiu poñer en marcha unha edición especial de Nadal de Merca-Valga, para continuar promovendo as compras nas tendas e negocios de Valga nunha das épocas do ano de maior consumo.}

^{Entregaranse outros dous premios, consistentes igualmente en 500 euros en vales de compra, coincidindo cos dous sorteos máis emblemáticos desta época: a Lotería de Nadal, que ten lugar o 22 de decembro, e o Sorteo do Neno, o 6 de xaneiro. As papeletas para participar xa se están repartido nos comercios adheridos.}