- O obxectivo é rebaixar un 40% as emisións locais no ano 2030

- O Concello está adherido, dende febreiro, ao Pacto das Alcaldías polo Clima e a Enerxía Sostible

^{Valga, 24 de novembro de 2020.}

^{O Pleno de Valga aprobou onte por unanimidade o Plan de Acción para o Clima e a Enerxía Sostible, co que o Concello se marca como obxectivo a redución das emisións de gases de efecto invernadoiro no termo municipal para tratar de minimizar os riscos derivados do cambio climático.}

^{Neste documento, están recollidas as medidas propostas polo Concello para diminuír as súas emisións de gases de efecto invernadoiro (principais responsables do actual cambio climático) e reducir os riscos derivados dos efectos do cambio climático sobre a poboación valguesa (tales como as secas, os asolagamentos, os incendios forestais ou as vagas de calor). Así mesmo, plantéxanse unha serie de medidas encamiñadas a reducir a pobreza enerxética.}

^{Os obxectivos que se marca o Concello coa aplicación destas accións correctoras inclúen avanzar cara un municipio eficiente, reducir a xeración de residuos e mellorar a súa recollida, fomentar unha economía verde e circular, fomentar o uso das enerxías renovables, reducir as emisións municipais e promover a redución das non municipais e loitar contra a pobreza enerxética, entre outros.}

^{Este Plan de Acción xorde da adhesión do Concello de Valga ao Pacto das Alcaldías polo Clima e a Enerxía Sostible, unha iniciativa da Comisión Europea fronte ao cambio climático e para a aplicación de boas prácticas en ámbitos coma a mellora da eficiencia enerxética ou a redución das emisións de CO2. Este Pacto é unha rede composta por municipios de todo o mundo que comparten o compromiso de reducir un 40% as súas emisións de gases de efecto invernadoiro no ano 2030.}

^{Na sesión plenaria tamén se deu conta á Corporación dos informes sobre execución trimestral do orzamento, o período medio de pago a provedores e o informe sobre prazos de pago correspondentes ao terceiro trimestre do ano.}