- Os centros educativos de Valga participaron na gravación dun spot de rexeitamento de calquera tipo de violencia

- O Centro de Información á Muller realizará o día 24 un reparto de material para a concienciación

^{Valga, 17 de novembro de 2020.}

^{O Concello de Valga, a través da Concellería de Igualdade e Benestar Social, pon en marcha unha campaña de concienciación e sensibilización da poboación contra a violencia de xénero, con motivo do 25-N, data na que se conmemora o Día Internacional para a eliminación da violencia contra a muller.}

^{As actividades comezan hoxe mesmo coa difusión de mensaxes de persoeiros ilustres a prol da igualdade e a liberdade ou sobre o feminismo e contra a violencia. Esta iniciativa arrancou cunha frase de Nelson Mandela, Premio Nobel da Paz en 1993 (“Ser libre non é só desfacerse das cadeas propias, senón vivir dunha forma que respecte e mellore a liberdade dos demais”), e continuará ata o día 21 de decembro con outras mensaxes de Concepción Arenal, Emilia Pardo Bazán, Martin Lugher King ou Malala Yousafzai, entre outros.}

^{O martes día 24 o Centro de Información á Muller levará a cabo un reparto de material de sensibilización no Centro de Saúde. As profesionais do CIM protagonizarán, ademais, un programa na Radio Municipal no que reflexionarán sobre a violencia machista e a igualdade.}

^{O mércores 25, Día contra a violencia de xénero, presentarase un spot gravado nos centros educativos de Valga: a Escola Infantil Municipal, o CRA, os colexios Ferro Couselo e Baño, o IES de Valga, a Escola de Música e o CODI. Esta peza audiovisual pretende visualizar a unidade e o compromiso da comunidade educativa ante o rexeitamento de calquera forma de violencia exercida por razóns de xénero. Esta acción é subvencionada pola Deputación.}

^{Outra das actividades desta campaña de sensibilización celebrarase o venres, día 27, no Auditorio Municipal. Entre as 16:00 e as 20:00 horas instalarase un stand do programa “Agresión Off: Eu digo non á violencia sexual”, da Secretaría Xeral de Igualdade da Xunta.}

^{Incluirá obradoiros de sensibilización e actividades lúdicas dirixidas a todas as idades. No caso do público infantil, hai un espazo especial destinado a dinámicas adaptadas á súa idade. Entre as temáticas que se abordan destacan o desmantelamento de estereotipos de xénero co obxectivo de combater o sexismo desde a infancia; mitos sobre o amor; alerta de micromachismos; a parella e a igualdade; autoestima e valoración persoal; violencia e novas tecnoloxías; e a educación en igualdade.}

^{Durante todo o mes de novembro pode verse no Auditorio unha exposición de pintura con obras  realizadas por usuarias do CIM no marco dun obradoiro de terapia creativa.}

^{Ademais, dende finais de setembro estase a desenvolver o obradoiro de participación “Muller e participación”, unha proposta para o diálogo, a expresión e o benestar das mulleres de Valga.}