- O proxecto inclúe pavimentacións en pedra, a colocación dunha fonte, o pintado de prazas de estacionamento para discapacitados e instalación de cartelería

- A actuación conta cunha subvención da Xunta, a través do organismo Turismo de Galicia

^{Valga, 12 de novembro de 2020.}

^{O Concello de Valga está a piques de rematar a execución dun proxecto de mellora da accesibilidade e da sinalización na área recreativa de Vilarello co obxectivo de potenciala como un dos principais recursos turísticos do municipio. Os traballos son realizados pola empresa Construcións Lemos e Martínez e son cofinanciados polo Concello e Turismo de Galicia.}

^{As actuacións plantexadas neste entorno van encamiñadas a mellorar a accesibilidade da zona, a súa sinalización, a mellora dos espazos de aparcadoiro existentes e a instalación de paneis promocionais.}

^{Nestes momentos estase a finalizar o acondicionamento da área de aparcamento emprazada nas proximidades da cafetería, un espazo duns 243 metros cadrados que tamén fai as funcións de distribuidor e acceso ás diferentes zonas da área recreativa, sendo o primeiro que ven os visitantes cando chegan. Esta zona, ata agora de terra, estase a pavimentar con lastros de pedra para que sexa máis accesible e practicable, ao tempo que se minimiza o impacto visual negativo.}

^{Nas inmediacións instalouse unha nova fonte de pedra coa forma da concha do peregrino, unha das iconas do Camiño de Santiago, xa que pola praia fluvial de Vilarello discorre a Ruta Xacobea do Mar de Arousa e Ulla.}

^{Xa está rematada tamén unha pequena ampliación das bancadas do auditorio ao aire libre que existe nesta área lúdica. O proxecto recolle, ademais, a pavimentación da zona de acceso a este auditorio, cos mesmos lastros de pedra que se empregaron noutras zonas para manter unha uniformidade en canto a materiais.}

^{Para completar a actuación sinalizaranse prazas de estacionamento para persoas con diversidade funcional, instalarase un planímetro con textos e pictogramas en braille coa distribución/orografía da zona para facilitar a accesibilidade ás persoas con discapacidade visual, colocarase sinalización direccional que faga máis doado chegar ata a área recreativa e, por último, instalarase un panel promocional dos principais recursos turísticos de Valga con imaxes e códigos QR, para que os visitantes os descubran e poidan visitalos.}