- Esta mañá comprobouse que o estado das obras de rehabilitación é compatible coa volta ás aulas en condicións de seguridade

- Representantes da Xunta estarán esta tarde, ás 16:30, no centro para aclarar dúbidas aos pais

^{Valga, 21 de setembro de 2020.}

^{As clases no colexio de Educación Infantil e Primaria Baño-Xanza darán comezo este mércores, día 23. Así o decidiron esta mañá representantes da Consellería de Educación, do Concello, da dirección do centro e da Anpa despois de comprobar o estado das obras.}

^{Os traballos realizados nos últimos días deixaron a planta baixa do recinto educativo apta para a actividade lectiva. É nesta zona na que se emprazan as aulas, polo que as clases poderán iniciarse en condicións de seguridade para o alumnado e sen que as obras interfiran nelas.}

^{Os retoques que quedan pendentes neste parte do recinto escolar executaranse fóra do horario lectivo. Coincidindo coas clases os operarios só realizarán traballos noutras áreas e plantas do colexio, de maneira que estudantes e obreiros non compartan espazos en ningún momento.}

^{A situación será provisional, xa que está previsto que o proxecto de rehabilitación integral do CEIP Baño-Xanza, no que a Xunta inviste preto de 800.000 euros, quede rematado a finais de outubro.}

^{A petición dun grupo de pais, esta tarde a partir das 16:30 horas estará no colexio representantes da Consellería de Educación para resolver as dúbidas que poidan ter os pais en relación ao inicio do curso.}