- As tres mellores tapas, que gañarán os Mandís de Ouro, Prata e Bronce, elixiranse por votación popular

- Un xurado profesional escollerá o petisco que se degustará na Festa da Anguía do 2021

- O goberno municipal decidiu suspender as actuacións e eventos multitudinarios nesta edición da festa debido á situación sanitaria

^{Valga, 10 de xullo de 2020.}

^{A Ruta-Concurso “Tapa a Anguía”, que o Concello convoca anualmente dentro da programación da Festa da Anguía e Mostra da Caña do País, celebrarase as dúas últimas fins de semana do mes de agosto. Será a sétima edición desta iniciativa, coa que se quere promocionar un dos produtos estrela da festa, a anguía, e incentivar o consumo nos locais de hostalería do municipio.}

^{Os bares e restaurantes que queiran participar teñen de prazo ata o día 27 de xullo para anotarse no Concello. A folla de inscrición poden descargala na ligazón https://www.valga.gal/atencion-cidada/impresos-solicitudes e deben entregala debidamente cuberta no Rexistro municipal.}

^{“Tapa a Anguía” presenta este ano varias novidades con respecto a edicións anteriores. A degustación de petiscos nos establecementos participantes prolongarase durante dúas fins de semana completas, as do 22 e 23 de agosto e 29 e 30. As tapas serviranse de xeito gratuíto coas consumicións. Os sábados o horario de degustación será de 12:00 a 15:00 e de 20:00 a 23:00 e os domingos de 12:00 a 15:00 horas.}

^{Outro dos cambios introducidos refírese aos premios. Nas últimas edicións as tres mellores tapas eran elixidas conxuntamente polos votos populares e por un xurado profesional. Nesta ocasión, os Mandís de Ouro, Prata e Bronce recaerán nas tres tapas máis votadas polo público. E manterase igualmente o xurado profesional, que será o encargado de elixir a tapa que se degustará o vindeiro ano na Festa da Anguía.}

^{Entre as persoas que participen na elección dos petiscos gañadores sortearanse dez vales de compra de 30 euros cada un para gastar no comercio local.}

^{Sen actos multitudinarios na XXX Festa da Anguía e Mostra da Caña do País}

^{A Festa da Anguía e Mostra da Caña do País, declarada de Interese Turístico de Galicia, adaptará este ano a súa programación á situación sanitaria provocada pola pandemia do coronavirus. O goberno municipal decidiu suspender os actos multitudinarios, polo que non haberá degustación nin actuacións musicais no Parque Irmáns Dios Mosquera.}

^{Si se manteñen, en cambio, outras das actividades máis representativas da festa. É o caso da ruta “Tapa a Anguía”, pero tamén do Concurso da Caña do País, do certame Embelecer Valga ou do concurso artístico para elixir o cartel anunciador.}