- As concelleiras Begoña Piñeiro e Malena Isorna acompañaron ao rexedor na visita ao home de máis idade do municipio

- Agasallárono cunha placa conmemorativa, un ramo de flores e unha torta

^{Valga, 5 de xullo de 2020.}

^{O alcalde, José María Bello Maneiro, e as concelleiras Begoña Piñeiro e Malena Isorna felicitaron esta mañá a Hipólito Cerqueiras Pardal no día do seu centenario.}

^{Os representantes municipais visitárono no seu domicilio en Moldes (Cordeiro) para agasallalo, en nome de todos os valgueses. Unha placa conmemorativa coa lenda “O Concello de Valga a Hipólito Cerqueiras Pardal no día en que cumpre os 100 anos", un ramo de flores e un torta para celebrar o aniversario foron os regalos que lle entregaron. O novo centanario soprou as candeas co número 100 e brindou cos edís e coa súa familia nesta data tan especial.}

^{Hipólito Cerqueiras, viúvo dende hai un lustro, viviu sempre en Vilarello ata que nos últimos anos se trasladou coa súa filla pequena, Angelita, a Moldes. Casou cunha veciña da mesma aldea e adicouse á agricultura. Sobreviviu á Guerra Civil, na que participou como recruta da última quinta, e agora tamén á pandemia do coronavirus. Porque el sempre tivo un obxectivo, chegar aos cen anos, e hoxe cúmprese o seu soño. “Toda a vida dixo que quería chegar aos 100 e cando brindaba sempre dicía ‘De hoxe en 100 anos’”, conta unha das súas netas, Mónica. Por iso as últimas datas foron de moita ilusión e nervios pola proximidade do centenario.}

^{Como non pode ser doutra maneira, a celebración está a ser por todo o alto e rodeado da súa extensa familia. Reuniuse cos seus cinco fillos –tivo un sexto que faleceu de mozo– para xantar e, pola tarde, recibirá a visita de netos (16), bisnetos (máis de 20) e tataranetos (4), entre outros achegados. Será un momento moi especial e emocionante xa que algúns deles levan sen velo dende antes do confinamento.}

^{Hipólito Cerqueiras é o home de máis idade de Valga. Outras dúas mulleres do municipio superan tamén os cen anos: María Bouzas, veciña de Cerneira, que está a piques de cumprir 104 anos, e María Josefa Senín, de Reguengo, que ten 101.}