- O proxecto, cun orzamento de 119.666,68 euros, foi subvencionado pola Consellería do Medio Rural

- O vial pasou a ter un ancho medio de 4,5 metros e conta cunha nova capa asfáltica

^{Valga, 23 de xaneiro de 2018.}

^{Valga e o municipio veciño de Cuntis contan xa cunha nova comunicación por estrada. As obras de acondicionamento do vial que discorre entre o núcleo de Martores, na parroquia de San Miguel, e o lugar de Magán, no termo de Cuntis, están xa rematadas.}

^{Os traballos consistiron no ensanche desta estrada rural de 1,78 quilómetros de lonxitude, realizándose un sobreancho de plataforma, a apertura de cunetas e dotándoa de firme de triple tratamento asfáltico. O vial conta agora con 4,5 metros de ancho medio, o que favorece o tránsito de vehículos en condicións de maior seguridade para beneficio da poboación asentada na zona.}

^{A empresa pública Tragsa executou as obras, que contaron cun orzamento de 119.666,68 euros e foron financiadas pola Xunta de Galicia a través da Consellería de Medio Rural e, en concreto, con fondos do Plan de Infraestruturas Rurais (PIR).}

^{Os proxectos subvencionados no marco do plan PIR tratan de contribuír ao desenvolvemento das zonas rurais e falicitar as comunicacións entre veciños, así como dotar á poboación de servizos básicos necesarios para unha maior calidade de vida.}