- O tamaño medio dos peixes, procedentes da piscifactoría de Carballedo, é de 20 centímetros

- Na antiga explotación mineira pode practicarse a pesca recreativa sen morte por colectivos coma maiores e discapacitados

^{Valga, 28 de maio de 2020.}

^{O alcalde, José María Bello Maneiro, asistiu esta mañá na Mina Mercedes á solta de cincocentos exemplares de troita por parte da Delegación Territorial da Xunta en Pontevedra, a través da Xefatura Territorial de Medio Ambiente.}

^{A repoboación da lagoa por parte do Concello e da Xunta ten como obxectivo relanzar a actividade neste couto de pesca recreativa sen morte, constituído como tal en febreiro de 2012 pola Consellería de Medio Ambiente.}

^{Os exemplares de troita adulta que se soltaron hoxe teñen dous anos e proceden da piscifactoría de Carballedo (Cotobade). A súa talla é considerable, xa que rondan os 20 centímetros. A solta realizouse en varios puntos da lagoa baixo a supervisión dun axente medio ambiental da Xunta, quen explicou que os peixes teñen agora que adaptarse ás súas novas condicións de vida nesta antiga explotación mineira.}

^{A Mina Mercedes, que se localiza no lugar da Torre (Campaña), é a maior lagoa de orixe non natural da provincia de Pontevedra cunha extensión de arredor de 30.000 metros cadrados. No seu día foi unha explotación de arxila a ceo aberto vencellada á actividade industrial da empresa de cerámica Novo y Sierra e, posteriormente, o Concello promoveu a súa recuperación.}

^{Na actualidade conforma un ecosistema de grande valor natural con comunidades vexetais formadas por árbores como salgueiros, amieiros e freixos e prantas como a espadana, a palla real ou a platanaria. Neste hábitat establécese de maneira temporal ou permanente unha variada fauna avícola, sendo especialmente numerosas as poboacións de patos e gansos.}

^{En 2012 a lagoa converteuse en couto de pesca sen morte para colectivos coma maiores e persoas con discapacidade, tendo como especie principal a troita. A Cámara Oficial Mineira de Galicia e o Instituto Geológico y Minero de España destacan a Mina Mercedes como un magnífico exemplo de recuperación dun espazo mineiro en beneficio da biodiversidade e da sociedade.}