- Os protectores faciais foron feitos por un grupo de costureiras voluntarias

- Entregáronse casa a casa tres tamaños para veciños de distintas franxas de idade

^{Valga, 9 de maio de 2020.}

^{O Concello rematou no día de onte o reparto de mascarillas por todas as parroquias do municipio para contribuír á protección da poboación ante o coronavirus a medida que se relaxan as medidas de confinamento.}

^{Os protectores faciais foron entregados porta a porta pola Policía Local e membros da agrupación de Protección Civil, que deixaron en cada casa unha mascarilla para cada residente e unhas instrucións de uso.}

^{As mascarillas, confeccionadas en algodón e liño, son reutilizables. Antes de empregalas por primeira vez e despois de cada uso recoméndase lavalas a máis de 60 graos de temperatura ou desinfectalas con lixivia rebaixada en auga (20 mililitros de lixivia por cada 980 mililitros de auga). Ademais, tamén se recomenda o planchado.}

^{Foron feitas por un grupo de dezasete costureiras voluntarias do municipio de forma completamente desinteresada. Realizáronse tres tamaños distintos de mascarillas para outras tantas franxas de idade: de 0 a 5 anos, de 6 a 14 e de 15 anos en diante. O goberno municipal agradece a estas costureiras a sua colaboración e o esforzo realizado durante as últimas semanas para que todos os valgueses poidan contar con protección.}

^{Se algún veciño non recibiu a súa mascarilla pode chamar ás oficinas do Concello (986 55 94 56)..}

^{Recentemente apareceron tres mascarillas das entregadas polo Concello tiradas no entorno da rotonda da Charca, na estrada que vai á Devesa, o que supón unha falta de respecto para as persoas que traballaron arreo para confeccionalas e para a seguridade dos veciños. O Concello pide que se algún veciño máis non quere ou non necesita estas mascarillas, que o devolva ou chame ao Concello para que vaian a buscalo e, así, poida dárselle a persoas que si o precisan.}

^{Unha vez que todos os veciños teñen as súas mascarillas, o goberno local pídelles que cando saian das súas casas ou estean en contacto con outras persoas as poñan, xa que esa é a maneira de protexerse e que Valga siga na boa liña, sen practicamente casos de coronavirus.}