- A Xunta de Galicia investirá 854.064 euros no acondicionamento do centro de Educación Infantil e Primaria

- Os traballos no interior das instalacións executaranse durante o verán

^{Valga, 6 de maio de 2020.}

^{A Consellería de Educación, Universidade e Formación Profesional licitou as obras de rehabilitación integral do CEIP Plurilingüe Baño-Xanza, nas que investirá 854.064’09 euros. O anuncio de licitación xa foi publicado na plataforma Contratos de Galicia e as empresas teñen ata o día 26 de maio para presentar as súas ofertas.}

^{O prazo de execución é de tres meses. A Consellería ten previsto executar as obras no interior do colexio durante este verán e compatibilizar o remate dos traballos exteriores coa actividade docente ao comezo do vindeiro curso.}

^{O CEIP Plurilingüe de Baño-Xanza está formado por dúas edificacións, unha máis antiga destinada a Educación Primaria e outra máis recente na que se concentran as aulas de Educación Infantil. As obras programadas dentro da rehabilitación integral abranguen os dous edificios.}

^{No edificio de Educación Primaria, que ten unha superficie de 4.332 metros cadrados e foi construído en 1973, executaranse as seguintes obras:}

^{- A substitución da cuberta por panel de sándwich de chapa de aceiro galvanizado con recheo de espuma de poliuretano, incluídos os canlóns e as baixantes}

^{- Melloras na fachada, que será sometida a reparacións e limpeza e á colocación de illamento térmico.}

^{- Substitución das ventás actuais por carpintería de aluminio con rotura de ponte térmica e dobre vidro baixo emisivo e renovación das persianas.}

^{- Instalación de novas luminarias con tecnoloxía LED nas aulas de arte, de actividades extraescolares e na ludoteca.}

^{- Reforma dos baños da segunda planta, nos que se reformarán as instalacións de fontanería e saneamento, substituiranse os alicatados, pintaranse os teitos, renovaranse os sanitarios e griferías e tamén as carpinterías interiores.}

^{- Outras melloras xerais coma o pintado e acondicionamento de aulas}

^{No edificio de Educación Infantil, de construción moito máis recente e que ten 420 metros cadrados de superficie, a principal actuación a realizar será a mellora do illamento térmico.}

^{As actuacións programadas para este centro educativo completaranse coa limpeza e baleirado da fosa séptica e a instalación do colector para a acometida á rede xeral de saneamento.}

^{A reforma integral do CEIP Baño-Xanza foi anunciada pola Conselleira de Educación, Carmen Pomar, nunha visita que realizou ao propio colexio a comezos do mes de marzo. O obxectivo destas obras é ofrecer ao alumnado do centro unhas instalacións máis cómodas, acolledoras e funcionais para o desenvolvemento da actividade lectiva.}

^{O goberno municipal agradece á Consellería a celeridade coa que licitou o proxecto, que foi aprobado pola Xunta de Goberno Local a mediados de abril xunto coa licenza de obra.}