- Araceli González e Cruz Eiras foron designadas polo Pleno para estar á fronte do Xulgado

- O servizo, que se presta en horario de 9:00 a 14:00, trasladarase en próximas datas ao edificio administrativo

^{Valga, 12 de febreiro de 2020.}

^{O Xulgado de Paz de Valga acolleu este mediodía a toma de posesión das xuízas titular e suplente para os vindeiros catro anos.}

^{Araceli González Sánchez e Cruz Eiras Isorna foron designadas polo Pleno, na sesión celebrada no mes de novembro, para continuar exercendo os seus respectivos cargos –Araceli González coma xuíza titular e Cruz Eiras coma suplente–, que levan desempeñando dende hai 8 e 12 anos.}

^{A toma de posesión consistiu na sinatura da acta remitida polo Tribunal Superior de Xustiza de Galicia.}

^{O Xulgado de Paz presta atención ao público en horario de 9:00 a 14:00. Actualmente faino na planta baixa da Casa do Concello, aínda que en próximas datas trasladarase ao novo edificio de usos administrativos, na Praza Manuel Vicente Cousiño.}

^{As funcións deste xulgado inclúen dende a celebración de actos de conciliación entre veciños que teñen algún tipo de conflito ata o oficio de matrimonios civís. Tamén se ocupa do Rexistro Civil (nacementos, defuncións, etc.).}