- Alemáns e portugueses foron as nacionalidades máis repetidas

- Máis de 94.600 camiñantes pasaron por Valga o pasado ano a través dos camiños Portugués e da Costa

^{Valga, 23 de xaneiro de 2020.}

^{O albergue de Valga rexistrou durante o pasado ano un total de 4.747 pernoctas de peregrinos que se dirixían cara a Santiago a través do Camiño Portugués ou o Camiño Portugués da Costa. Setembro foi o mes con máis hóspedes (751), seguido de agosto (719), maio (708) e abril (698).}

^{As instalacións valguesas, que forman parte da rede pública de albergues de Galicia xestionada pola Sociedade Anónima de Xestión do Plan Xacobeo, contan con 78 prazas distribuídas en tres habitacións e dispoñen, ademais, de cociña, comedor, duchas con auga quente, almacén de bicicletas, botiquín, calefacción central, sala de reunións, lavandeiría con lavadora, secadora e tendedeiro, así coma un xardín. O prezo da pernocta é de oito euros por persoa e o horario de admisión é de 13 a 22 horas.}

^{As nacionalidades máis habituais entre os peregrinos que elixen o albergue do Pino son a alemá, seguida de portuguesa, italiana, estadounidense e holandesa. Os peregrinos españois limítanse sobre todo á época estival, especialmente o mes de agosto.}

^{Segundo os datos estatísticos da Oficina do Peregrino, no pasado ano foron 94.649 os camiñantes que pasaron por Valga, o que representa o 27’23% do dotal de persoas que obtiveron a Compostela. Destes máis de 94.600 peregrinos, 72.357 fixeron o Camiño Portugués, mentras que os restantes 22.292 elixiron o Camiño Portugués da Costa. Estas dúas vías a Santiago captan cada vez máis camiñantes, sendo a segunda e a terceira rutas máis transitadas.}