- “Brinco Encarnado” e “José Bonaparte: Non vas a ningunha parte” son os títulos dos dous textos que valorará o xurado  

- O gañador será gratificado con 600 euros e a súa obra representarase dentro do programa de actos da recreación da Batalla de Casaldeirigo

^{Valga, 22 de xaneiro de 2020.}

^{A Concellería de Cultura recibiu dúas obras dentro do prazo para optar ao Premio de Teatro “A Guerra da Independencia en Valga”, un certame que anualmente convoca o Concello como unha das iniciativas coas que rememorar a Batalla de Casaldeirigo, que se librou na localidade no ano 1809. “Brinco Encarnado”, presentada baixo o pseudónimo Pepa Michela, e “José Bonaparte: Non vas a ningunha parte”, asinada co nome ficticio Paco Xestas, son os títulos dos textos presentados ao concurso.}

^{Segundo establecían as bases, ao Premio de Teatro podían concorrer obras inéditas e escritas en galego, cunha extensión mínima de 25 folios a dobre espazo e divididas en tres actos, que garden relación coa Guerra da Independencia e, en concreto, centradas no episodio da revolta popular dos veciños de Casaldeirigo contra as tropas francesas.}

^{Hai que ter en conta que se trata dunha representación popular na que participarán actores afeccionados e que se desenvolverá ao aire libre nas inmediacións da Capela da Virxe da Saúde polo que, ademais da calidade das obras, o xurado encargado de fallar o premio terá en conta a viabilidade da súa posta en escena.}

^{Establécese un único premio de 600 euros que, ademais, implica a obriga de colaborar na dirección da obra para a súa representación dentro do programa de actividades da recreación da Batalla de Casaldeirigo. O autor do texto premiado cederá en exclusiva ao Concello os dereitos de reproducción, distribución, comunicación pública e transformación da obra en todo o territorio da Unión Europea para a súa explotación, execución teatral, edición e produción.}