- Reúne case duascentas imaxes que concorreron ao segundo Premio de Fotografía convocado polo Grupo de Desenvolvemento Rural

- As instantáneas recollen diferentes elementos, paisaxes e recursos do territorio que forma parte do GDR

^{Valga, 2 de xaneiro de 2020.}

^{O Auditorio Municipal acolle durante o mes de xaneiro a mostra itinerante “Descubrindo o rural”, unha iniciativa do Grupo de Desenvolvemento Rural Salnés Ulla-Umia.}

^{A exposición reúne case duascentas fotografías de 64 autores diferentes –fotógrafos  afeccionados e profesionais– que ofrecen a súa singular visión do medio rural vencellado ao desenvolvemento sustentable. As imaxes, que recollen diferentes elementos, paisaxes e recursos do territorio do GDR, foron presentadas á segunda edición do concurso de fotografía “Descubrindo o rural”, convocado polo GDR co obxectivo de poñer en valor os recursos naturais, culturais, históricos e artísticos dos dezaseis concellos da súa zona de influencia: Valga, Pontecesures, Catoira, Caldas de Reis, Portas, Cuntis, Moraña, Vilagarcía de Arousa, Vilanova, Cambados, O Grove, A Illa de Arousa, Meaño, Meis, Ribadumia e Sanxenxo.}

^{Entre as fotografías expostas atópanse as premiadas no certame: “Desconexión”, captada nas inmediacións das Torres de Oeste en Catoira por José Ramón Miguéns Calvo e gañadora do primeiro premio; “A verea dourada”, de Sonia Pita Formoso, tomada en Meis e que obtivo o segundo posto; e en terceiro lugar “Atardecer en Ribadumia” de Isaac Ventoso Leiro.}