- Varias agrupacións do CSM Galicia ofrecerán un ciclo de concertos de Nadal no centro comercial “Área Central” de Santiago

- O alcalde considera “espectacular” o programa de actividades que se levará a cabo en Valga

^{Valga, 18 de decembro de 2019.}

^{O Centro Superior de Música de Valga (CSM Galicia) presentou a programación que levará a cabo durante estas festas de Nadal e, ademais, ofreceu un avance, das actividades a desenvolver en 2020, ano para o que o centro ten xa confirmada a presenza de figuras de relevancia internacional coma o barítono Carlos Álvarez ou a concertista de piano Judith Jáuregui.}

^{Os directores do CSM Galicia, Manuel Villar e Pere Molina, e o alcalde, José María Bello Maneiro, compareceron esta mañá no Auditorio para dar a coñecer esta programación, que ten coma primeira cita o concerto de Nadal que se celebrará esta tarde, a partir das 20 horas, no Auditorio e que correrá a cargo dos alumnos do centro. Nas actuacións estarán representadas as diferentes especialidades que se imparten no centro, como vento madeira, vento metal, piano, música moderna ou jazz, entre outras. A entrada é gratuíta.}

^{Durante estas semanas festivas, o CSM Galicia protagonizará un ciclo de concertos no centro comercial “Área Central” de Santiago. A primeira actuación terá lugar mañá xoves, 19 de decembro, a cargo da Orquestra de Jazz do CSM, dirixida por Alfonso Calvo. O día 27 será o turno da Ensemble de Clarinetes, dirixida por Javier Morgade; e o 3 de xaneiro actuará o Combo de Música Moderna, con Alejandro Casquero á batuta. Os tres concertos terán lugar ás 18:30 horas.}

^{Ademais, a partir de xaneiro de 2020 haberá un cita mensual no Auditorio cos alumnos do Centro Superior, que ofrecerán concertos os últimos mércores de mes ás 20 horas e sempre con entrada de balde para todo o público que queira asistir}

^{Pere Molina, coordinador de actividades do CSM Galicia, ofreceu un avance dalgunhas das clases maxistrais e concertos que se levarán a cabo durante o vindeiro ano. Algunhas delas serán impartidas por profesores titulares do centro. É o caso, no mes de xaneiro, de Alberto Arribas, mestre de trompa, e Javier Morgade, profesor de clarinete. En febreiro están xa pechadas as masterclass de Tod Williams e Antonio Romero, mestres de contrabaixo, e de Cristóbal Soler, profesor de dirección de orquestra do CSM Galicia e exdirector do Teatro Nacional da Zarzuela de Madrid. As datas de cada unha destas actividades e a información relacionada coas inscripcións poden consultarse na páxina web do centro www.csmgalicia.com, no apartado “Eventos”.}

^{Outras das clases maxistrais que están previstas para 2020 estarán dirixidas por músicos invitados. Por exemplo, a soprano internacional Lorena Valero, o pianista de música moderna Alejandro Casquero ou Ángel Luis Quintana, violonchelo solista da Orquestra Nacional de España, que estará no Auditorio os días 2 e 3 de febreiro.}

^{En marzo visitará o Centro Superior Conrado Moya, uno dos mellores marimbistas do panorama internacional actual. Estará en Valga os días 28 e 29 de marzo xunto a Javier Eguillor, timbaleiro solista da Orquestra Sinfónica de Valencia e actualmente principal invitado no Conservatorio Superior de París. Completará o equipo de percusión Raúl Benavent, solista da Orquestra de Radio Televisión Española.}

^{En abril, os días 4 e 5, terá lugar unha masterclass a cargo do Mikhail Pochekin, solista internacional de Moscú e integrante da Orquestra do Mariinski de San Petersburgo. Nesas mesmas datas o centro contará tamén coa presenza de Vicente Alberola, clarinete solista da Mahler Chamber Orchestra e un dos profesores de clarinete máis solicitados a nivel nacional e internacional.}

^{Entre todos os artistas e profesores invitados cos que contará nos próximos meses o Centro Superior de Música, Pere Molina descatou a dous: a concertista internacional de piano Judith Jáuregui e o barítono Carlos Álvarez. Sobre a primeira explicou que o día 29 de abril ofrecerá un concerto en Pontevedra e “púxenme en contacto co seu ‘manager’ para transmitirlle que estabamos interesados en tela no centro. Afortunadamente, Judith prefireu estar uns días antes en Valga. Non é nada habitual isto –explica Pere Molina–, xa que normalmente os artistas que van a ofrecer un concerto nunha determinada comunidade ou país intentan que sexa unha cita única”.  A pianista fixo unha excepción neste caso e estará no Auditorio o día 27 de abril.}

^{No tocante ao barítono malagueño Carlos Álvarez, é unha figura recoñecida internacionalmente e que actúa nos mellores escenarios do mundo, entre eles o Metropolitan de Nova Iorque, o Covent Garden de Londres ou a Scala de Milán. “Ten pechada a súa axenda ata finais de 2022, pero recentemente chamoume dende o Covent Garden, onde está representando Simón Boccanegra, para propoñernos dúas datas para nós”, relatou Pere Molina durante a comparecencia. “Para nós é un orgullo de que os futuros cantantes poidan gozar con este profesor”.}

^{Tanto Pere Molina como Manuel Villar amosaron a súa satisfacción polo dinamismo e importante axenda de actividades que está a organizar o Centro Superior de Música, que no seu primeiro curso conta con 40 alumnos. “Conseguir isto en tan poucos meses non é fácil, son moitas horas de traballo, ilusión, empeño e dedicación”. Os directores agradeceron ao Concello o seu apoio para que este ambicioso proxecto estea dando froitos.}

^{Manolo Villar avanzou, por último, algunhas das iniciativas nas que está traballando o CSM Galicia co obxectivo de acadar unha maior expansión. Un deles é a próxima posta en marcha dunha aula virtual que permitirá seguir as actividades e cursos que se leven a cabo en Valga dende calquera parte do mundo. Ademais, estanse organizando uns Campamentos de Verán que realizarán no colexio Lasalle de Santiago durante o mes de xullo.}

^{O alcalde, José María Bello Maneiro, felicitou ao centro pola “espectacular programación” que está promovendo. “Estamos encantados de ter dado colaborado para que este soño sexa hoxe unha realidade”.}