- Vinte autobuses chegaron a Campaña na mesma xornada, a do domingo

- O nacemento pode visitarse de xeito gratuíto ata o vindeiro 12 de xaneiro

^{Valga, 16 de decembro de 2019.}

^{O Belén Artesanal en Movemento segue a batir os seus propios récords e a acadar cifras de visitantes ata o de agora nunca rexistradas, o que o confirma como unha das composicións de Nadal máis afamadas de Galicia e de España e como un dos principais atractivos turísticos de Valga.}

^{Se durante a primeira semana de apertura, a da Ponte da Constitución, se rexistraron máis de 11.000 visitas, non foi menos a expectación durante a pasada fin de semana.}

^{O sábado o nacemento permaneceu aberto durante toda a mañá para recibir a un total de nove excursións chegadas dende A Coruña, Coristanco, Santiago, Baiona, Tomiño, Ourense ou A Guarda, en entre outras procedencias. Pola tarde, xa no horario habitual de apertura, chegaron a Campaña outros sete autobuses facendo un total de 16 en toda a xornada, unha cifra récord. Ata entón, o número máis elevado de excursións que recibira o Belén Artesanal nun só día fora de 14, durante a pasada edición.}

^{Pero ese novo rexistro foi superado tan só un día despois, onte domingo, cando acudiron ao nacemento vinte autobuses cargados de excursionistas de toda Galicia e doutras comunidades españolas. Vigo, Ferrol, Verín, Ponferrada, Xixón ou Alacante eran algúns dos lugares dos que procedían estes grupos de visitantes.}

^{Ademais, esta mesma mañá acudiron ao Belén outras dúas excursións: unha integrada por quince membros da asociación A Creba, de Riveira, e outra con 54 feligreses das parroquias de Arzúa e Arca. Para os vindeiros días están concertadas outra decena de visitas de colexios, centros día e varios colectivos.}

^{Estas cifras non fan máis que confirmar a crecente sona do Belén Artesanal en Movemento de Valga, declarado de Interese Turístico de Galicia, e o bo traballo realizado pola asociación Amigos do Belén, que cada ano se encarga de montar o nacemento e crear novos contidos que sorprendan e atraian ao público.}

^{O nacemento estará aberto ao público de xeito gratuíto ata o 12 de xaneiro: entre semana de 17:30 a 20:30 horas, os sábados de 17 a 20:30 e os domingos e festivos de 12 a 14 horas pola mañá e de 17 a 20:30 pola tarde. Os colexios, asociacións e outros grupos poden concertar as visitas a través do teléfono 630 95 25 15.}