- Dentro da mesma actuación tamén se mellorará o piso do patio cuberto para evitar esvaróns

- A Xunta inviste nestes traballos, que foron solicitados polo goberno municipal, case 22.000 euros

^{Valga, 14 de novembro de 2019.}

^{Deron comezo no CEIP Plurilingüe Baño-Xanza as obras de renovación do peche perimetral, contratadas pola Consellería de Educación, Universidade e Formación Profesional á empresa Covisam Norte S.L.}

^{Os traballos, que suporán unha mellora da seguridade no recinto educativo, consisten na retirada do antigo valado, que se atopa moi deteriorado debido á súa antigüidade, e a instalación dun novo peche formado por paneis ríxidos.}

^{A actuación inclúe, ademais, a execución de melloras no patio cuberto do colexio, en concreto o fresado do piso para evitar que se produzan esvaróns.}

^{Estas obras foron solicitadas polo goberno municipal á Xunta de Galicia, en beneficio da comunidade educativa do CEIP Baño-Xanza, principalmente do alumnado. Son financiadas íntegramente pola Xunta de Galicia, cun investimento de 21.755’79 euros.}

^{No mesmo colexio de Baño tamén se realizaron recentemente traballos de mellora do sistema de calefacción no edificio de Educación Infantil. Retiráronse os radiadores eléctricos para conectar esta zona do colexio á calefacción de gasoil que xa funcionaba no resto do centro. O orzamento foi de 23.276’71 euros.}