- A mostra, que aborda temáticas como a violencia de xénero ou a igualdade, pode verse no Auditorio Municipal entre o 1 e o 30 de outubro

- Os cadros foron pintados durante as sesións de Arteterapia que Ángeles Garrido imparte semanalmente no centro para persoas con discapacidade

^{Valga, 28 de setembro de 2019.}

^{O Auditorio Municipal retoma en outubro a súa actividade cultural despois dos meses de verán e faino coa exposición de pintura “Presenzas de Muller”, da asociación de persoas con discapacidade dos vales Ulla e Umia (Asdivalu).}

^{Os usuarios do CODI ofrecen a súa particular visión sobre diferentes problemáticas e temáticas vencelladas á muller, dende a violencia de xénero e a igualdade ata a discapacidade ou a natalidade e, relacionada con esta, os problemas de contaminación que sofre a “nai terra”.}

^{Trátase dunha mostra esencialmente reivindicativa, na que predomina a cor violeta e cobran protagonismo slogans como “Liberdade”, “Á(r)mate, muller” ou “Girl power”, entre outras mensaxes de empoderamento feminino.}

^{Os cadros que forman parte da exposición foron pintados polos usuarios do CODI nas sesións de Arteterapia que semanalmente lles imparte a artista local Ángeles Garrido e que, ademais de pintura, inclúen manualidades, artesanía con barro e outras disciplinas.}