- A actividade, promovida polo Colexio de Enxeñeiros Informáticos e a Axencia para a Modernización Tecnolóxica, desenvolveuse na Aula CeMIT

- Os participantes coñeceron porque voa un dron, programaron unha aeronave e, por último, dirixírona

^{Valga, 14 de agosto 2019.}

^{O programa “Tech Kids”, destinado a fomentar o interese pola ciencia e a tecnoloxía entre a mocidade e  a impulsar as vocacións científico-tecnolóxicas e os novos perfís dixitais, fixo esta semana unha parada na Aula CeMIT de Valga coa actividade “Voa con nós”, unha xornada sobre pilotaxe de drons dirixida a rapaces de entre 9 e 16 anos de idade.} 

^{Os drons estanse a converter unha ferramenta esencial no entorno laboral. Empréganse, por exemplo, para emerxencias, tarefas de mantemento, entregas a domicilio ou traballos audiovisuais, entre outras moitas aplicacións.}

^{Esta xornada, organizada polo Colexio Profesional de Enxeñaría en Informática e a Axencia para a Modernización Tecnolóxica de Galicia, integrou a programación co mundo dos drons. Os participantes comezaron coñecendo que é un dron, porque voa e que partes ten. A continuación tiveron oportunidade de programar un dron, é dicir, desde un ordenador e por medio dunha programación por bloques, converteron o dron nunha aeronave non tripulada e autónoma. E, por último, os rapaces puideron demostrar as súas habilidades na pilotaxe destas naves.}

^{Esta iniciativa, que se realizou por segundo verán consecutivo na Aula CeMIT, permitiu aos participantes achegarse cunha forma lúdica e divertida á enxeñaría informática. Iniciáronse na programación (aprendendo o ciclo da vida do software, as variables e os algoritmos), achegáronse ás matemáticas, en concreto á trigonometría e a conceptos básicos de teoremas de Pitágoras, e tamén adquiriron habilidades cognitivas visuais a través da pilotaxe.}