- A súa obra, “Labrando nutrientes. Intensificación agraria e manexo a fertilidade do solo nunha agricultura atlántica: Galicia, séculos XVIII e XIX”, impúxose na primeira modalidade, dotada con 4.000 euros

- A segunda modalidade quedou deserta ao non axustarse os traballos presentados ás bases do certame

^{Valga, 30 de xullo de 2019.}

^{Un traballo sobre o sector agrario na Galicia dos séculos XVIII e XIX proclamouse gañador do XX Premio de Investigación Xesús Ferro Couselo.}

^{Hoxe 30 de xullo, no día no que se cumpren 113 anos do nacemento do Fillo Predilecto de Valga, dase a coñecer a decisión do xurado que se reuniu o pasado día 26 na Casa do Concello e que estivo integrado por Pegerto Saavedra Fernández, catedrático de Historia Moderna na Universidade de Santiago de Compostela e membro da Real Academia Galega; Xulio Rodríguez González, director do Museo Arqueolóxico de Ourense e facultativo do corpo superior de museos; Pablo Sánchez Ferro, neto de Xesús Ferro Couselo, director do Arquivo Histórico Provincial de Ourense e técnico superior do corpo facultativo de arquiveiros da Xunta de Galicia; e Marcial Gondar Portasany, catedrático de Antropoloxía Social da USC, membro da sección de Etnografía do Instituto de Estudos Galegos Padre Sarmiento e do padroado do Museo do Pobo Galego. Como secretario, con voz pero sen voto, actuou José Ramón Rial Becerra, membro do Servizo de Normalización Lingüística do Concello de Valga.}

^{Na primeira modalidade o tribunal concedeu o premio á investigadora Beatriz Corbacho González, que concorreu ao certame coa obra “Labrando nutrientes. Intensificación agraria e manexo da fertilidade do solo nunha agricultura atlántica: Galicia, séculos XVIII e XIX”. Beatriz Corbacho (Pontevedra, 1985) é licenciada en Historia, doutora en Historia Contemporánea e membro do Grupo de Historia Agraria e Política do Mundo Rural (Histagra) da Universidade de Santiago de Compostela. Como gañadora do Premio recibirá 4.000 euros e a súa obra será publicada polo Concello.}

^{No tocante á segunda modalidade do certame, na que se outorga unha bolsa de estudos de 3.000 euros para proxectos centrados en estudos históricos, etnográficos ou sobre persoeiros do municipio de Valga, o xurado decidiu nesta ocasión declarar deserto o premio debido á “inadecuación dos proxectos presentados aos obxectivos marcados nas bases e a deficiente metodoloxía proposta”.}

^{Á XX edición do Premio de Investigación concorreron un total de catro traballos, dous na primeira modalidade e outros dous na segunda. Este certame trata de promover e incentivar os estudos actuais de investigación no campo das ciencias históricas e vén sendo convocado polo Concello de Valga dende o ano 1996, no que a Real Academia Galega adicou o Día das Letras Galegas a Xesús Ferro Couselo.}