- Os recoñecementos recaeron en alumnos dos colexios de Baño e Ferro Couselo, do IES de Valga e da Escola de Música

- O acto contou coa participación do director xeral de Educación da Xunta, Manuel Corredoira

^{Valga, 28 de xuño de 2019.}

^{O Concello de Valga rendeu homenaxe aos mellores estudantes dos centros educativos do municipio nun acto celebrado onte pola tarde no Auditorio Municipal.}

^{Foron nove os homenaxeados. Os galardóns aos mellores expedientes de Educación Primaria recaeron en Carla Herrero Suárez, do CEP Xesús Ferro Couselo, e Irene Sanmarco Miguéns, do CEIP Baño-Xanza. En Educación Secundaria Obrigatoria foi recoñecida María Ortigueira Piñeiro, mentras que en Bacharelato os mellores expedientes foron os de Silvia Pérez Vidal, na rama de Ciencia e Tecnoloxía, e Sara Castaño Barreiro na modalidade de Humanidades e Ciencias Sociais.}

^{No ciclo de Fabricación Mecánica de FP Básica, o alumno máis destacado foi Francisco Ande García, no Ciclo Medio de Soldura e Caldeiraría o recoñecemento recaeu en David Bernal Blanco e no Ciclo Superior de Construcións Metálicas, en Daniel Regenjo Touceda. Por último, o estudante co mellor expediente da Escola Municipal de Música durante o curso recén rematado foi Iago Sobrino Martínez, alumno de Grao Profesional na especialidade de trombón.}

^{Os galardoados recibiron un diploma, una placa e unha tablet como agasallo.}

^{O acto contou coa participación do alcalde, José María Bello Maneiro, a concelleira de Educación, Carmen Gómez, e como representante da Xunta de Galicia asistiu o director xeral de Educación, Formación Profesional e Innovación Educativa, Manuel Corredoira López. Os centros educativos valgueses tamén tiveron presenza na homenaxe da man dos directores da Escola Infantil Municipal, Aurora Díaz; do CRA de Valga, Manuel Abraldes; do CEP Ferro Couselo, Miguel Fernández; do CEIP Baño-Xanza, Eva Zumalave; da Escola de Música, Manuel Villar; e do vicedirector do IES de Valga; Eliseu Mera.}

^{No turno de intervencións, o alcalde deu a “noraboa” a todos os galardoados e tamén aos profesorado dos respectivos centros e ás familias dos alumnos. “Entre todos formaron un equipo” que os conduciu ao éxito, dixo. Alentounos, ademais, a continuar “por esta senda, traballando para seguir sendo os mellores”.}

^{Pola súa parte, o director xeral referiuse a Valga como “un concello volcado coa educación” e louvou a iniciativa de recoñecer o traballo feito por estes estudantes. “É unha obriga estudar por parte dos alumnos, pero tamén é unha obriga nosa recoñecer o seu esforzo porque o futuro está aquí”.}

^{Algúns dos estudantes homenaxeados tomaron a palabra para agradecer o traballo do profesorado dos seus respectivos centros e o apoio dos seus pais e familias, determinantes para lograr estes éxitos académicos. Tamén aplaudiron a iniciativa do Concello por enxalzar, con estes recoñecementos, os valores do esforzo.}

^{Por último, o director do Ferro Couselo referiuse aos nove galardoados como uns “alumnos exemplares”. “Os seus resultados son reconfortantes para profesorado e o seu talento, adicación e perseverancia fan que se lles abran cada vez máis portas para o seu futuro académico e profesional”.}

^{Durante o acto actuaron Iago Sobrino, que interpretou dous temas co trombón, e a Agrupación de Cámara da Escola Municipal de Música coa solista Lorena Rodríguez e dirixida por Francisco Javier Morgade.}