- No encontro farase tamén unha lectura solidaria de poemas de Sesé Mateo, autora vítima da violencia de xénero

- O instituto fai un convite a todas as persoas interesadas pola literatura para que asistan o xoves ás 16:30 horas

Deixe a súa mensaxe

Valga, 11 de xuño de 2019.

Arantza Portabales será a escritora convidada na última sesión deste curso do Club de Lectura do IES de Valga, que terá lugar este xoves ás 16:30 horas. No encontro comentarase o libro “Deixe a súa mensaxe despois do sinal”, que foi gañador do Premio de novela por entregas La Voz de Galicia no ano 2015 e tamén finalista dos premios San Clemente e de Novela Europea Casino de Santiago.

Arantza Portabales (Donostia, 1973) é unha escritora galega filla de emigrantes no País Vasco que regresou coa súa familia a Marín en 1985. Licenciouse en Dereito pola Universidade de Santiago de Compostela e traballa como funcionaria da Escala Superior de Finanzas da Xunta de Galicia.

Comezou a escribir no ano 2013, no xénero do microrrelato. “Deixe a súa mensaxe despois do sinal” é unha historia construída a partir das mensaxes gravadas no contestador automático dun teléfono. A novela foi traducida ao castelán, ao italiano e ao hebreo.

Ademais de comentar esta obra, na sesión do xoves vaise realizar unha lectura solidaria de “No camiño do vento”, poemario escrito por Sesé Mateo. Esta autora de Chapela (1965-2017) foi asasinada pola súa parella nun crime de violencia machista. A recadación polas vendas deste libro, publicado postumamente por iniciativa dos seus fillos, destínase á Fundación Mujeres.

O Club de Lectura do IES fai un convite especial a todas as persoas de Valga e da súa contorna interesadas nas súas actividades para que asistan a este último encontro do curso. Durante os últimos meses, ademais de Portabales, participaron nas sesións do club outros autores como Inma López Silva, Marcos Calveiro e Rosalía Rial.

boton auditorio

boton edificio usos admin

boton casa cultura

boton codi

boton facebookboton twitter   boton youtube

boton sede electronica

boton bandos

boton bella otero

boton rueiro

boton directorio

boton radio

boton tempo

Volver