- O proxecto inclúe a construción dunhas gradas, a execución dun carril bici e senda peonil, a dotación de aseos públicos e o acondicionamento das áreas deportiva e de xogos

- O Concello e a Xunta investirán nesta actuación un total de 476.575 euros

^{Valga, 28 de maio de 2019.}

^{A Consellería de Medio Ambiente, Territorio e Vivenda licitou as obras de humanización e mellora do Parque Irmáns Dios Mosquera, nas que o Concello e a Xunta de Galicia investirán 476.575’42 euros en virtude dun acordo de cooperación asinado entre as dúas administracións.}

^{O obxectivo é realzar a importancia deste entorno e convertelo na zona de recreo e lecer por execelencia do municipio e da contorna, ofrecendo aos veciños e visitantes un espazo de calidade e cheo de posibilidades, dando valor á súa paisaxe característica e facéndoo o máis versátil posible para a realización do maior número de actividades.}

^{As actuacións que se proxectan son:}

• ^{Construción dun escenario e unhas gradas, separados polo regato existente e que non suporán alteración do entorno xa que quedarán integradas no propio desnivel físico do terreo.}
• ^{Execución dun carril bici arredor do parque con carácter de circuíto pechado pero, ao mesmo tempo, con posibilidade de continuidade futura. Ademais, en paralelo a este carril, crearase unha senda peonil para favorecer os paseos sen interromper a actividade interna do parque.}
• ^{Instalación dunha nova pasarela peonil cruzando o regato e que dea continuidade á senda.}
• ^{Acondicionamento da pista deportiva, dándolle valor e utilidade á zona hormigonada existente e dotándoa de equipamento axeitado para a práctica deportiva.}
• ^{Dotación de mobiliario urbano como papeleiras, mesas e bancos que ofrezan aos usuarios a comodidade axeitada para gozar dunha xornada no parque.}
• ^{Ampliación da zona de parque infantil, coa instalación de máis xogos para nenos de distintas idades.}
• ^{Habilitar aseos públicos e un almacén nunha pequena edificación xa existente no parque.}

^{As empresas que queiran optar á adxudicación do proxecto poden presentar as súas ofertas ata as 14 horas do día 12 de xuño. As obras teñen un prazo de execución de seis meses.}

^{Cunha superficie aproximada de tres hectáreas e situado á beira do río Valga, o Parque Irmáns Dios Mosquera alberga unha área fluvial e recreativa composta por unha zona adicada ao baño e outra de parque infantil, parque biosaudable para maiores e zonas de esparexemento e de práctica deportiva. É, ademais, o remate dunha senda que comeza na Casa do Concello e continúa polo Museo da Historia ata chegar ao novo Centro de Interpretación da Caña, a antesala do parque propiamente dito. Nesta zona atópase tamén a estatua da Bella Otero e celébrase anualmente a Festa da Anguía e Mostra da Caña do País, xunto a outras actividades.}