- Os festexos, que terán lugar o día 1 de xuño, inclúen teatro, música de percusión co grupo Pelepau e un espectáculo luminoso e pirotécnico

- O prazo para participar na cea campestre está aberto ata o día 27 de maio

^{Valga, 15 de maio de 2019.}

^{Casaldeirigo rememora o vindeiro 1 de xuño a batalla da Guerra da Independencia que se librou no lugar en 1809. A recreación da contenda, da que se cumpren 210 anos e que enfrentou aos veciños da zona co exército de Napoleón, reunirá nos arredores da Capela da Saúde a uns douscentos figurantes que revivirán a cruenta pero desigual loita na que as alarmas locais demostraron a súa ousadía e valor para, con armas improvisadas e rudimentarias, facer fronte ás preparadas tropas francesas.}

^{As alarmas de Valga non estarán soas na batalla, senón que lle chegarán reforzos doutras zonas de Galicia. En Casaldeirigo estarán tamén alarmas de Pontecaldelas e San Antoniño de Mos, arroupados por outros colectivos participantes como o grupo de Entroido “Os da Troula”, a asociación Casco Vello de Vigo ou a asociación Cabalar de Valga, baixo a organización do Concello e da asociación cultural Heroes de Casaldeirigo.}  

^{As actividades darán comezo ás 17 horas co desfile cara as inmediacións da Capela da Saúde, onde se pasará revista ás tropas, izaranse as bandeiras dos países participantes e haberá unha homenaxe aos caídos. A continuación desenvolverase a recreación da batalla.}

^{A actuación de Cantos de Taberna, das Pandereteiras Virxe da Saúde e Trebóns do Berbés precederá a outra das citas salientables da tarde, a representación teatral da obra "O que Napoleón non se levou”, escrita por Marcela Rodríguez e gañadora do Premio de Teatro “A Guerra da Independencia en Valga”. A obra será representada por actores afeccionados: integrantes da Escola Municipal de Teatro e veciños.}

^{Durante a tarde haberá degustación gratuíta de rosquillas e actividades e obradoiros para os máis cativos. Non faltará a animación e o espectáculo con Troula e a música correrá a cargo de Pelepau, grupo de percusión que mestura a música popular de Galicia con outros ritmos traídos polas comunidades de emigrantes retornados. Ao anoitecer, un espectáculo pirotécnico iluminará a Capela da Saúde.}

^{Pola noite terá lugar a cea campestre, para a que se admiten inscricións ata o día 27 de maio no teléfono 693 504 940 ou a través de calquera membro da asociación Heroes de Casaldeirigo. O prezo é de 18 euros por persoa. O fin de festa poñerano Unión y Fuerza e o dúo Master.}