- O alcalde, o vicepresidente da Federación Galega de Fútbol e o presidente do Cordeiro C.F. presentaron o torneo

- A xogadora infantil do Cordeiro, Adriana Iglesias, competirá coa selección de Santiago

^{Valga, 12 de abril de 2019.}

^{O Complexo Deportivo de Campaña acolle o vindeiro luns, 15 de abril, o Campionato Galego de Seleccións Comarcais femininas sub-14 e masculinas sub-15, un evento organizado pola Real Federación Galega de Fútbol (RFGF) coa colaboración do Cordeiro C.F., que está a celebrar este ano o 50 aniversario da súa fundación, e o Concello de Valga.}

^{O torneo foi presentado hoxe polo alcalde, José María Bello Maneiro, o vicepresidente da Federación, Javier García, e o presidente do Cordeiro C.F., José Ramón Seco, e o coordinador da base e entrenador do equipo sénior do club valgués, Luis Eiras.}

^{Bello Maneiro destacou que “é un orgullo que a Federación pensara en Valga para celebrar este torneo, o que fala moi ben das instalacións deportivas coas que contamos e que poden acoller eventos de primeiro nivel”. O rexedor felicitou ao Cordeiro polos seus 50 anos e tamén polo traballo que está a desenvolver a actual directiva, “especialmente nas categorías inferiores, que é onde máis debemos volcarnos: na formación da canteira tanto no aspecto deportivo como, sobre todo, na educación en valores”.}

^{Participarán no campionato oito seleccións masculinas sub-15 en representación das distintas delegacións federativas: Santiago, Vigo, Ourense, A Coruña, Ferrol, Lugo, Pontevedra e Costa da Morte. No caso do torneo feminino sub-14, serán sete os combinados en competición xa que a Costa da Morte non conseguiu xuntar as suficientes rapazas. Os partidos disputaranse entre as 10 e as 19 horas con entrada gratuíta para todo o público que queira asistir.}

^{Entre as participantes no campionato feminino estará Adriana Iglesias, xogadora do equipo infantil do Cordeiro, que formará parte da selección de Santiago.}

^{Estas seleccións comarcais serven de filtro para formar as seleccións galegas de ambas categorías, aínda que a competición ten tamén un obxectivo lúdico-deportivo xa que durante toda a xornada xerarase unha convivencia entre os participantes. Nas instalacións municipais de Campaña reuniranse case 300 futbolistas, 18 por cada equipo, que participarán nunha comida de confraternización organizada polo Cordeiro C.F. A eles hai que engadir os acompañantes que se desprazarán a Valga cos diferentes equipos (pais, nais e outros familiares), que pasarán o día no municipio e comerán nos establecementos de hostalería locais.}

^{Neste sentido, o vicepresidente da Federación apuntou que o luns “vai ser un día de festa para Valga”. Javier García transmitiu a disposición da entidade que representa para seguir traballando conxuntamente co Concello de Valga no fomento do deporte base.}

^{Pola súa parte, Luis Eiras, en representación do Cordeiro C.F. agradeceu á Federación Galega “que pensara en nós á hora de organizar este evento” e ao Concello “por prestarnos a axuda necesaria”. “Queremos que os nenos do noso club se vexan reflexados nestas seleccións”, dixo.}