- A mostra pode verse no Auditorio Municipal ata o vindeiro 30 de abril

- Reúne 26 cadros que teñen a cor como principal característica

^{Valga, 11 de abril de 2019.}

^{O Auditorio Municipal acolle ata o vindeiro 30 de abril a mostra “Pintando ilusións”, composta por 26 cadros da autoría de Rosa Crespo.}

^{A exposición une dúas das principais afeccións da artista, a pintura e as camelias, que cultiva dende hai máis de 25 anos e que lle teñen reportado numerosos premios e recoñecementos. A denominada “flor de Galicia” protagoniza boa parte das obras, outorgándolle á mostra un colorido que é característico da pintura de Rosa Crespo. “Son cadros que, alí onde se poñan, iluminan”, explica.}

^{“Pintando ilusións” vén de expoñerse no Museo Torres de Marín durante o pasado mes de febreiro e no Museo de Monçao (Portugal) en marzo. Predomina o realismo, aínda que tamén inclúe un par de “ensaios” de pintura abstracta que “están gustando moito”, indica a artista. Ademais, destacan un cadro con textura pintado sobre tela de saco e outro que mistura a técnica do óleo co repuxado en aluminio.}

^{En canto ás temáticas, ademais de inspirarse nas camelias, Rosa Crespo reproduce nas súas obras paisaxes de Valga, como o Parque Irmáns Dios Mosquera ou as fervenzas. Tamén recurre, noutros casos, aos motivos mariños (barcas, redes ou conchas) ou a tradicións galegas coma a dos Maios.}