- O prazo para anotarse estará aberto ata o 29 de marzo e precísanse un mínimo de 15 inscritas

- A actividade é financiada a través do Pacto de Estado contra a violencia de xénero

^{Valga, 8 de marzo de 2019.}

^{O Concello de Valga organiza un curso de defensa persoal dirixido a mulleres. Trátase dunha actividade gratuíta e que ofrecerá ás participantes un conxunto de técnicas de autoprotección orientadas a impedir ou repeler unha agresión. As interesadas poden anotarse no Concello ou no Auditorio ata o vindeiro 29 de marzo e precísanse un mínimo de 15 incritas para que poida desenvolverse o curso, que se financia a través do Pacto de Estado contra a violencia de xénero.}

^{As sesións desenvolveranse os xoves de 21 a 22 horas durante uns dous meses e serán impartidas pola Escola Zenyin, en concreto por Julio Oliveira, 5º dan de Hapkido e experto en intervención con mulleres vítimas de violencia de xénero, e Raquel Vila, 2º dan de Hapkido, actual campioa de España de Hapkido e subcampioa do mundo de defensa persoal.}

^{O curso constará de contidos tanto teóricos como prácticos. Entre os primeiros, impartiranse charlas de autoprotección nas que, entre outras cousas, se explicará ás mulleres como avaliar e detectar situacións de risco. Na parte práctica, ensinaránselles unha serie de técnicas sinxelas e que non requiren de ningunha condición física específica nin unha idade determinada, pero que son eficaces á hora de repeler unha agresión ou frear unha ameaza.}