- Alumnado de ESO, Bacharelato, FP Básica e ciclos asistiron a unha conferencia sobre o autoemprego

- Plantexar as distintas alternativas formativas e laborais é o obxectivo destas xornadas

^{Valga, 11 de febreiro de 2019.}

^{O IES de Valga deu comezo hoxe á Semana de Orientación e Emprego, unha iniciativa que organiza por segundo ano e que ten como obxectivos divulgar a oferta educativa do centro e e orientar, dende os puntos de vista académico e profesional, aos estudantes de 4º da ESO, 2º de Bacharelato e dos ciclos formativos de FP, ao estaren en cursos finais de etapa.}

^{“Tratamos de plantexar ao alumnado as diversas alternativas coas que contan, tanto se queren continuar cos seus estudos como se prefiren incorporarse ao mercado laboral”, explica a orientadora do instituto, Pilar Lestido, que acompañou á directora, Dolores Rego, no acto inaugural ao que asistiron alumnos de varios centros educativos da contorna: o CPI Progreso de Catoira, do CPI Pontecesures e o IES Macías O Namorado de Padrón. Foron recibidos na biblioteca, onde se lles presentou a oferta educativa do IES de Valga, prestando especial atención aos ciclos formativos de Construcións Metálicas e de Soldadura e Caldeiraría, e a continuación fixeron un percorrido polas instalacións do centro.}

^{Durante esta Semana de Orientación e Emprego sucederanse os relatorios nos que “se falará de distintas maneiras de emprender, do autoemprego ou de fórmulas empresariais como a cooperativa. Tamén se tocarán asuntos vencellados aos sindicatos e ás súas funcións e ás formas de comunicación coa administración”, avanza Pilar Lestido. A primeira destas conferencias tivo lugar este mediodía e correu a cargo de Santiago Resua Nine, da empresa IRONOR Metalurgia S.L., que relatou a súa experiencia como emprendedor ante estudantes de 4º da ESO, 2º de Bacharelato, 2º de FP Básica e ciclos.}

^{Mañá será o turno dos sindicalistas Carmiña Naveira e Eduardo Sebio, que participarán nun coloquio sobre condicións laborais e, a continuación, terá lugar un obradoiro sobre ferramentas de comunicación coa administración guiado polos técnicos da Universidade de Santiago Ana Domínguez e Delfín Pérez.}

^{O mércores persoal técnico da rede Eusumo impartirá a conferencia “As cooperativas, fórmula de economía social” e pechará os relatorios o deportista, actor e humorista David Amor, que contará a súa propia experiencia na charla “Namórate do que fas”.}

^{A Semana da Orientación e do Emprego rematará o xoves 14 con visitas á Universidade de Santiago, ao CIFP Politécnico e á Escola de Arte Mestre Mateo.}