AXUDAS PARA O FOMENTO DO EMPREGO (ANO 2021)
O Concello ten activa a convocatoria de subvencións para o fomento do emprego correspondente ao ano 2021. O obxectivo destas axudas é promover a inserción no mercado laboral de persoas desempregadas de Valga, ben sexa como traballadores por conta allea ou como autónomos.
Poden ser beneficiarios destas axudas persoas físicas e xurídicas de carácter privado non afectadas por expedientes de regulación de emprego e que formalicen contratos a tempo completo ou media xornada por un período mínimo dun mes con desempregados do municipio. As persoas contratadas deben cumprir os seguintes requisitos:
- Levar empadroados en Valga un mínimo de tres meses no momento da solicitude da subvención
- Levar desempregado un mínimo de catro meses no momento da firma do contrato
Tamén poden acollerse á liña de subvencións persoas que queiran darse de alta como autónomos. Neste caso, os requisitos son:
- Non ter estado dado de alta como autónomo nin no censo de actividades económicas nos catro meses inmediatamente anteriores á data da citada alta
- Non ser traballador por conta allea en ningún dos seus réximes
- Ter domicilio fiscal no concello de Valga
- Tramitar a alta no censo municipal do IAE do Concello de Valga
- Acreditar un mínimo de seis meses de alta á hora da petición do primeiro pago, que se efectuará a partir do primeiro semestre de actividade
- Estar empadroado en Valga cunha antigüidade mínima de tres meses
As solicitudes poden formularse nun prazo máximo de dous meses dende a firma do contrato ou inicio da actividade como autónomo presentando no Concello o impreso debidamente cuberto acompañado da documentación requerida, que pode consultarse nas bases desta convocatoria.
Bases da convocatoria de subvencións para o fomento do emprego
