O MODELO DE COMPOSTAXE DE VALGA ACADA UNHA NOTA DE “SOBRESAÍNTE” NO SEU BALANCE DE SEGUIMENTO

- Máis de 1.000 composteiros domésticos e 6 centros comunitarios permiten xestionar 250 toneladas de residuos orgánicos ao ano

- Persoal técnico de Amigos da Terra realizou nas últimas semanas visitas de control a máis dun cento de domicilios

^{Valga, 15 de outubro de 2026.}

^{Dende que, en 2020, Valga implantou a compostaxe como sistema de reciclaxe de residuos orgánicos téñense distribuíndo entre a poboación local 1.050 composteiros domésticos, instalado dous centros de compostaxe comunitaria na Avenida da Coruña e na rúa Doutor de Oya Salgueiro e outros catro en grandes produtores do municipio: colexio Baño-Xanza, restaurante Gran Barril, empresa Extrugasa e hotel Corona de Galicia.}

^{O bo facer por parte da veciñanza permitiu, dende os comezos, acadar os obxectivos en canto á separación dos biorresiduos, evitando o seu depósito nos contedores da fracción resto e converténdoos en fertilizante natural para hortas e xardíns. Grazas a este esforzo colectivo, estanse a retirar do circuíto convencional do lixo unhas 250 toneladas de residuos orgánicos ao ano, transformándoos nun recurso útil para a contorna.}

^{Para dar apoio aos veciños que contan con composteiros nos seus domicilios e asesoralos, persoal técnico da asociación Amigas da Terra, contratada polo Concello, realizou nas últimas semanas visitas individualizadas de seguimento e control.}

^{Realizaranse un total de 106 visitas a outras tantas vivendas para comprobar o funcionamento dos composteiros e revisar o seu estado xeral e rexistrar datos coma o nivel de enchido ou a temperatura acadada. Tamén se asesorou ás persoas usuarias sobre algúns dos problemas máis habituais no proceso de compostaxe, como a escaseza de estruturante; a falta ou exceso de humidade; presenza de mosquiña ou ratos... Os técnicos animaron aos veciños a continuar empregando este sistema, facéndoos conscientes da importancia do seu papel á hora de atallar a problemática global dos residuos.}

^{Nas súas conclusións, o persoal de Amigas da Terra destaca que tanto “a implicación da veciñanza” coma “a integración deste modelo de xestión da materia orgánica” en Valga son “sobresaíntes”.}

^{Nesta acción finánciase cunha subvención da Consellería do Medio Ambiente, que concedeu 20.000 euros para o programa municipal de compostaxe a través dunha orde de axudas a entidades locais de Galicia para o financiamento de actuacións dirixidas a incrementar a ecoeficiencia na xestión de residuos de competencia municipal, cofinanciada pola Unión Europea no marco do programa Galicia Feder 2021-2027.}