AS INSTALACIÓNS DEPORTIVAS DE CAMPAÑA MODERNÍZANSE COA INSTALACIÓN DE CÉSPEDE ARTIFICIAL DE ÚLTIMA XERACIÓN

- A obra forma parte do proxecto de mellora das instalacións deportivas municipais, que suma un investimento de 1’4 millóns

- Neste recinto tamén se están a acondicionar as bancadas, con traballos de illamento e pintado

^{Valga, 5 de setembro de 2026.}

^{Nas instalacións deportivas de Campaña deron comezo esta semana os traballos de renovación integral do céspede artificial dun dos campos de fútbol, o máis antigo, cuxa superficie se atopaba xa deteriorada dificultando a práctica deportiva. As obras comprenden a retirada da vella superficie e a posterior colocación dunha nova moqueta sintética de última xeración, deseñada para ofrecer a máxima durabilidade.}

^{A primeira fase dos traballos, que se atopa en execución consiste nun proceso especializado de desinstalación, separación e reciclaxe do céspede artificial desgastado. Emprégase maquinaria automatizada que extrae o manto sintético, separa o recheo (area de sílice e caucho) e enrola o céspede xa limpo para facilitar a súa posterior reutilización.}

^{Unha vez retirado o terreo antigo, procederase á instalación do novo céspede artificial, que segue os estándares FIFA Quality Pro, está indicado para un uso intensivo e garante un rendemento de alta duración. Prescindirase completamente do caucho, adiantándose así o Concello á prohibición do uso deste material, que entrará en vigor en 2031 co obxectivo de reducir a contaminación por microplásticos. No seu lugar emprégase un recheo ecolóxico a base de carozos de millo que presenta, como principais vantaxes, a sustentabilidade, a redución da calor acumulada no campo e a proporción de amortiguación.}

^{Outras características do novo céspede é que incorpora protección contra os raios UVA e xa ten integrada a marcaxe, de xeito que as liñas do terreo de xogo están tinguidas na propia fibra. Tamén conta con homologación do CSIC que garante a reciclaxe dos seus compoñentes ao final da súa vida útil.}

^{Ademais do cambio de céspede, nas instalacións deportivas de Campaña tamén se desenvolven traballos nas bancadas, que inclúen melloras no illamento e impermeabilización das galerías e balcóns, a posta a punto de todos os elementos metálicos e paramentos con tratamento anticorrosivo e o pintado.}

^{Estas actuacións enmárcanse nun proxecto de mellora das instalacións deportivas municipais que tamén contempla obras no campo de fútbol de Baño e no pavillón municipal de Beiro. O investimento total supera os 1’4 millóns de euros, co obxectivo de continuar modernizando as infraestruturas públicas para a práctica deportiva.}