O CONCELLO SACA A CONCURSO POR MÁIS DE 1’4 MILLÓNS A MELLORA DAS INSTALACIÓNS DEPORTIVAS MUNICIPAIS

- Actuarase no recinto de Campaña, no campo de fútbol de Baño e no pavillón de Beiro

- As obras fináncianse cunha aportación da Consellería de Presidencia e cun préstamo do Instituto Galego de Vivenda e Solo da Xunta

^{Valga, 4 de abril de 2026.}

^{O Concello de Valga licitou o proxecto de mellora das instalacións deportivas municipais, que inclúe obras por valor de 1’4 millóns de euros nos campos de fútbol de Campaña e de Baño e no pavillón polideportivo de Beiro.}

^{Nas instalacións deportivas de campaña substituirase a herba sintética do campo máis antigo, colocando un novo céspede artificial que seguirá os estándares FIFA Quality Pro, que está indicado para un uso intensivo e que garante rendemento de alta duración. Prescindirase completamente do caucho, adiantándose así o Concello á prohibición do uso deste material, que entrará en vigor en 2031 co obxectivo de reducir a contaminación por microplásticos. Ademais, tamén se acometerán reparacións nas bancadas.}

^{No recinto do campo de herba natural de Baño as actuacións proxectadas van dende melloras nas bancadas, reforma dos locais situados baixo estas, outras obras interiores e o sistema de rego.}

^{Por último, no pavillón de Beiro remataranse o acondicionamento da envolvente, pecharase a galería existente tralas bancadas e melloraranse a climatización, o sistema contraincendios e outro equipamento.}

^{Este proxecto financiarase cunha subvención de 700.000 euros da Xunta de Galicia, concedida a través da Consellería de Presidencia, Xustiza e Deportes. Para a outra metade do orzamento asinouse un convenio co Instituto Galego de Vivenda e Solo que permite ao Concello acceder ao Fondo de Cooperación para o apoio ao financiamento de actuacións de rehabilitación e conservación do patrimonio construído.}

^{O prazo para que as empresas presenten as súas ofertas remata o día 20 de abril.}