A HOSTELERÍA VALGUESA RESPALDA A RUTA “TAPA A ANGUÍA” E ESTE ANO SERÁN TRECE OS LOCAIS PARTICIPANTES

- Os inscritos son Pardal, Caprichos, Maneiro, Potel, Pontellón, Juan, A Charca, Pirata, Couceiro, Xa Bou, Auditorio, Comparada e Alba

- A cita gastronómica desenvolverase nas dúas últimas fins de semana de agosto

^{Valga, 4 de agosto de 2026.}

^{A loita polo premio ao mellor petisco de anguía estará este ano máis disputada que nunca. A Ruta-Concurso “Tapa a Anguía” dá un pulo na súa décimo terceira edición chegando a trece establecementos de hostalería participantes, a cifra máis alta dos últimos anos, o que demostra que se trata dunha iniciativa consolidada entre o sector e, ademais, entre a veciñanza e visitantes que teñen as últimas semanas de agosto marcadas como época para degustar a anguía en diferentes elaboracións.}

^{Os locais participantes nesta cita gastronómica, que forma parte da programación da Festa da Anguía e Mostra da Caña do País, son: Bar Pardal, Pastelería Caprichos, Bar Maneiro, Bar Potel, Café-Bar Pontellón, Bar Juan, Restaurante A Charca, Café-Pub Pirata, Café-Bar Couceiro, Café-Bar Xa Bou, Cafetería Auditorio, Casa Comparada e Bar Alba.}

^{A ruta celebrarase durante as dúas últimas fins de semana do mes de agosto. O apartado de concurso terá lugar os días 22 e 23. O público decidirá cos seus votos cales son as mellores tapas e, polo tanto, os locais gañadores dos Mandís de Ouro, Prata e Bronce. Para participar na votación é preciso reunir os selos dos bares participantes despois de degustar as súas tapas e introducir a papeleta nas urnas habilitadas ao efecto. Entre todas as persoas que participen na elección das mellores tapas sortearanse dez vales de 30 euros cada un para gastar no comercio local.}

^{Mantense, ademais, o xurado profesional, que será o encargado de elixir a tapa que se degustará na Festa da Anguía do vindeiro ano 2027.}

^{Na seguinte fin de semana (días 29 e 30 de agosto) tan só haberá degustación.}

^{Os petiscos serviranse de xeito gratuíto coas consumicións os sábados en horario de 12:00 a 15:00 e de 20:00 a 23:00 e os domingos de 12:00 a 15:00 horas.}

^{Esta iniciativa trata de promocionar un dos produtos estrela da principal festa gastronómica de Valga, a anguía, e incentivar o consumo nos locais de hostalería do municipio. O Concello será o encargado de facerlles chegar o peixe xa limpo para que poidan preparar os petiscos.}