A CONCELLEIRA MALENA ISORNA PARTICIPOU NA PRESENTACIÓN DA “INCHADIÑA BRANCA VELA”, QUE SE CELEBRA ESTE SÁBADO EN HOMENAXE A ROSALÍA

- Vilarello será punto de encontro dunhas trinta embarcacións tradicionais, que navegarán polo Ulla e o Sar en lembraza da escritora

- Dornas, galeóns e bucetas chegadas dende Arousa, Vigo, A Guarda ou Muros participan nesta XIII edición

^{Valga, 30 de xullo de 2026.}

^{A concelleira de Turismo, Malena Isorna, participou esta mañá na Casa de Rosalia na presentación da “Inchadiña branca vela”, a homenaxe que dende 2013 realizan as xentes do mar a Rosalía de Castro remontando os ríos Ulla e Sar en embarcacións tradicionais. A XIII edición celebrarase este sábado, 1 de agosto, con Vilarello coma un dos seus portos de referencia, no que se reunirán todas as embarcacións para emprender o traxecto ata Padrón.}

^{A representante do Concello de Valga acompañou ao presidente da Fundación Rosalía, Anxo Angueira, así coma aos alcaldes de Padrón, Dodro e Rianxo. Tamén participou Natividad González, responsable da área de Cultura da Deputación da Coruña.}

^{Angueira remarcou que “cando xurdiu esta iniciativa de homenaxear a Rosalía dende o mundo do mar e da navegación tradicional non imaxinamos chegar a esta décimo terceira edición e, ademais, moi ampliada. Se inicialmente viña só xente da Arousa coas súas dornas, agora a participación está moi diversificada con representantes da Ría de Vigo, da Guarda ou da Ría de Muros e con embarcacións diferentes: galeóns, bucetas, lanchas xeiteiras...”. En total participarán este sábado uns 30 barcos: unha decena partirán poña mañá dende Rianxo e será na área fluvial de Vilarello onde se unifiquen todas para realizar xuntas o último tramo do remonte, entre Valga e Padrón.}

^{Esta importante participación é, para o presidente da Fundación, un reflexo da “devoción pola figura de Rosalía de Castro” por parte das xentes do mar.}

^{Por outra parte, Anxo Angueira puxo en valor “a paisaxe marabillosa” que ofrecen os ríos Ulla, Sar e a súa confluencia: “Ao partir dende Vilarello a paisaxe que se nos mostra é estraordinaria”. Os rexedores e edís dos diferentes concellos polos que discorre a travesía apuntaron que actividades coma esta demostran que “Rosalía está moi viva” e que o patrimonio fluvial das bisbarras do Baixo Ulla e do Sar é digno de poñer en valor.}

^{En concreto, Malena Isorna, remarcou que “para Valga é un orgullo participar nesta iniciativa e que Vilarello sexa punto de encontro de todos os participantes. Que cousa máis fermosa que lembrar a Rosalía deste xeito!”.}