O GOBERNO LOCAL RECIBIU AOS EQUIPOS DO CORDEIRO C.F. QUE ACADARON CATRO ASCENSOS NA MESMA TEMPORADA

- O Prebenxamín A, Benxamín A, Xuvenil A e Sénior B subiron de categoría

- O alcalde felicitounos por “poñer o nome do Cordeiro e de Valga no máis alto”

^{Valga, 7 de xullo de 2026.}

^{O Salón de Plenos da Casa do Concello albergou onte á tardiña unha recepción aos equipos do Cordeiro C.F. que acadaron o ascenso na temporada que rematou fai tan só unhas semanas:}

• ^{O Sénior B, adestrado por Manuel Patiño, que se proclamou campión de Liga e acadou o ascenso a 2ª Autonómica.}
• ^{O Prebenxamín A, con Sergio Rey no banco, tamén saiu campión e ascendeu a 1º Autonómica.}
• ^{O Benxamín A, adestrado por Borja Seco, subiu a 1ª ao superar na fase de ascenso ao Victoria.}
• ^{O Xuvenil A, dirixido por Gabriel, xogará a vindeira temporada en Preferente tras gañar as dúas eliminatorias do Play Off de ascenso, nas que eliminou á UD Ourense e ao Poio CF.}

^{Na recepción participaron o alcalde, José María Bello Maneiro; o concelleiro de Deportes, Manuel Ferreiro; e os edís Román Castro, Carmen Gómez, Malena Isorna, José Ángel Souto, Begoña Piñeiro e Álvaro Fernández. A expedición do Cordeiro estivo encabezada polo presidente, José Ramón Seco, e integrada polos xogadores e técnicos dos catro equipos e tamén polas súas familias.}

^{Bello Maneiro felicitounos a todos polos grandes resultados acadados e por “poñer o nome do Cordeiro e de Valga no máis alto. Foi unha temporada para enmarcar. Por primeira vez un equipo xuvenil do Cordeiro xogará en Preferente e nunca na historia do club houbo un segundo equipo sénior en Segunda rexional”, sinalou. Tampouco se esqueceu dos máis cativos dos equipos prebenxamín e benxamín, que “fixestes unha temporada espectacular, de aí este recoñecemento” que fixo extensivo a xogadores, adestradores, directiva e familias. Os integrantes de cada equipo recibiron unha bolsa con agasallos institucionais, entre eles a insignia do Concello.}

^{Para o alcalde “é un orgullo e satisfacción” ter participado na fundación do Cordeiro C.F. e lembro tanto a súa etapa de directivo coma a de xogador, na que “algunha patada din pola banda dereita”, bromeou.}

^{Para rematar puxo en valor o traballo que está a realizar a actual directiva e anunciou que nas vindeiras semanas darán comezo as obras de mellora das instalacións deportivas municipais, cun investimento de 1’4 millóns de euros nos campos de Campaña, Baño e no pavillón de Cordeiro.}

^{En representación do club falou Anxo Barreiro, capitán do Sénior B, que sinalou que “é bonito” participar nestes éxitos das diferentes categorías. “Levo no club desde alevín e vivín momentos duros” polo que se amosou ledo de que na actualidade “haxa unha boa canteira que permita conseguir cousas”.}

^{Por último, houbo unha mención especial para Lucas Sieira, de Magariños, e Saúl Busto, de Outeiriño, que son as novas fichaxes do Celta, co que xogarán a próxima temporada en categoría benxamín.}