- En caso de incumprimento, a administración local executará a retirada e pasaralle os custos á compañía

- A empresa, ademais, debe presentar un informe sobre a situación de todos os postes da súa propiedade

^{Valga, 23 de outubro de 2023.}  

^{O alcalde, José María Bello Maneiro, emitiu un decreto no que outorga un prazo máximo de cinco días a telefónica para que execute os traballos de substitución dun poste no lugar da Devesa (Campaña) que ameaza con derrubarse debido ao mal estado no que se atopa.}  

^{Un informe dos técnicos municipais advirte do perigo que representa este poste e da necesidade de adoptar, con urxencia, medidas para garantir a seguridade na zona. A parte inferior do formigón está demolida por completo e o resto do poste está sostido unicamente polas varas interiores e polos cables do tendido aéreo, provocando un risco evidente de caída e potencial dano aos inmobles lindeiros, a viandantes e a vehículos.}

^{Despois de numerosas solicitudes, instanto a Telefónica a que execute as obras necesarias para regularizar a situación, e ante a inacción da empresa, o alcalde vén de emitir unha resolución na que outorga á compañía un prazo de dous días hábiles para iniciar as actuacións e un máximo de cinco días hábiles para telas rematadas. As obras que deben efectuarse, segundo recolle o informe técnico, son a desmontaxe e retirada do poste e a súa substitución por outro, así coma a estabilización dos tendidos aéreos no caso de ser necesario.}

^{De incumprir este mandato, o Concello executará as obras de xeito subsidiario pasando posteriormente os custes a Telefónica e poderá impoñerlle multas coercitivas.}

^{A empresa, ademais, dispón dun prazo de tres meses para presentar no Concello un informe sobre os postes da súa propiedade que ten no termo municipal, a súa situación e un plan de mantemento.}