- Os aprendices tamén construíron unhas escaleiras para dar acceso ás bancadas do auditorio ao aire libre

- Nesta área fluvial tamén renovaron cerca de 200 metros de varandas de madeira e crearon illas de contedores

^{Valga, 26 de setembro de 2023.}

^{Os integrantes do módulo de carpintería do Obradoiro de Emprego Ulla-Umia VI, baixo as directrices do experto docente a José Oliveira, remataron esta semana as actuacións que nos últimos meses desenvolveron na área fluvial de Vilarello e que supuxeron a renovación de boa parte das estruturas de madeira e a dotación de novo mobiliario. Entre este último, dous bancos de tres metros de longo cada un fabricados polos propios aprendices en madeira de abeto tratada. Teñen o respaldo en forma circular, adaptado á parede xunto á que están instalados, con vistas cara a zona da praia fluvial.}

^{Nestas últimas xornadas de actividade do Obradoiro, que se clausura este venres, tamén construíron unhas escaleiras de subida ás bancadas do auditorio ao aire libre, facilitando deste xeito o acceso do público que asista aos espectáculos e actividades que alí se desenvolvan. Nestas mesmas bancadas tamén se renovaron a totalidade das varandas, que se atopaban deterioradas, ao igual que nas zonas de miradoiro. En total construíron e instalaron preto de douscentos metros de novas varandas.}

^{As actuacións neste espazo natural completáronse coa construción de dúas illas para agrupar os distintos tipos de colectores do lixo e así favorecer a correcta separación de residuos. Os alumnos realizaron a cimentación das dúas illas, con base de formigón, e colocaron os balaústres e os listóns de madeira tratada en autoclave.}

^{A segunda especialidade do Obradoiro de Emprego foi a de forestais, na que os aprendices realizaron traballos de acondicionamento en espazos verdes do concello coma o Parque Irmáns Dios Mosquera, na Praza do Concello, na Mina Mercedes, en Baño e na praia de Vilarello, entre outros.}